Во ООУ „Мирче Ацев“ се одржа Саемот на мини-ученички компании, организиран во рамки на програмата Junior Achievement Macedonia, на кој учениците ги претставија своите иновативни идеи, бизнис-концепти и креативни решенија.

На настанот присуствуваше и градоначалникот на Општина Ѓорче Петров, Александар Стојкоски кој истакна дека општината е првата во Македонија што се вклучува во ваков пилот-проект, со цел уште од најрана возраст кај учениците да се развиваат претприемачки вештини, креативно размислување и иновативност.

-Особено ме радува што младите покажуваат иницијативност, тимска работа и желба да создаваат нови вредности. Токму преку вакви програми се градат идните лидери, претприемачи и носители на развојот на нашето општество. Како локална самоуправа ќе продолжиме да инвестираме во образованието, младите и можностите за нивен личен и професионален развој – порача Стојкоски.

Учениците презентираа повеќе мини-компании и проекти, демонстрирајќи практична примена на знаењата стекнати во образовниот процес. Нивните идеи беа доказ за потенцијалот што го поседуваат младите кога им се овозможуваат услови за креативен израз и претприемачко учење.

Општина Ѓорче Петров останува посветена на поддршката на образовните иницијативи кои ги охрабруваат младите да размислуваат иновативно, да преземаат иницијатива и активно да придонесуваат во заедницата.